~°(( موسوعة بين البارح و اليوم))°~||

لطالما تعلقنا بأيام الماضيـ و تفكرنا الياماتـ التي حتى لو كانتـ محزنة في بعض الاحيانـ الا أنها كانت مميزة و كانت حلوة بزااااف و ضرك رانا نتمناو نزيدو نعيشوها

و هذيـ بعض الحوايج اللي أنا نشوفـ بلي نقصت و رايحا تنقرضـ في زماننا

اذا راح نبدا ان شاء الله
و ما تنساوشـ شويـ ردود و تقييم اذا عجبكم الموضوعـ
+
اللي عندو حوايج لي هويا يشوفهم في بكريـ خير يزيد يكتبهم في الرد



البارحــــ : الناس توكل من طبسي واحد و الناس كامل تشبع حتى و لوكان العشا كان طرف خبز و كاس ما.
اليومــــــ : كل واحد يوكل في جهة و تعطيلو قنطار ماكلة ما يشبعش.
----
البارحــــ : كنا نزورو العائلة و الحبابـ meme بعاد و هوما يفرحو بينا و حنا نفرحو بيهم، صلة الرحم اللي وصى عليها الرسولـ ما خليناهاشـ.
اليومـــــ : نهار العيد لعشية خلاص يبعث للعائلة sms (سيرتو لاكان عندو puce allo) و اذا راحلهم و طولـ يبداو تاوع الدار يهزو في حواجبهم (يعني افهم روحك راك طولت شويا) عادو الناس ما يحملوش بعضاهم.
----
البارحــــ : كنا كاملـ العائلة نتفرجو في التيلفيزيون دايرين عليها نضحكو و نقصرو و نشربو التايـ.
اليومـــــ : ضرك كل واحد مخبي في شمبرتو واحد يتفرج في ماتش و لوخرا في مهند و هاذاك في الجزيرة جي تهدر معاه يديرلك حس و ما ننساوش جماعة كونكسيو اللي على العام خارج مجال التغطية.
----
البارحـــ : كانو الناس يسقسو على بعضاهم تغيب يوم يتحيرو عليك صحابك و صحاباتك.
اليومــــ : تغيب شهر واحد ما علابالو بيك، كل واحد يجري على همو يجرو ورا الدنيا.
----
البارحــــ : الناس يقولو الحمد لله.
اليومـــــ : الناس يقولو هل من مزيد؟
---
البارحـــ : الحياة كانت عندها بنة الشر و الميزيرية و المشاكل مي كاينا البسمة في الوجوه و الضحكا دايما تتسمع.
اليومــــ : دنيا صامطا الناس على العام تشكي ماكانش القناعة و الدنيا راهي Noir et Blanc
----

و لكنـ ناس البارح هوما ناس اليوم مي علاه العقليات تبدلتـ؟؟؟
تعيبون الزمان و العيب فينا ماكان للزمان عيب سوانا

السلام عليكم
على سلامتك كوبي كولي
ان شاء الله راك مليح خويا
.
.
موضوعك قيم بالبزاف
ويسلط الضوء على الوقت العجيب اللي وصلنالو
والا بالاحرى ماشي الوقت
صنف الناس اللي ولاو فالدنيا
كيما قلت الوقت هو الوقت لكن الناس هي اللي تبدلت
وكيفاش لا والواحد من نهار يزيد
يطلقوه دارهم للزنق
التربية تبدلت
بكري كانو يربوه على الاصالة والاسلام والاخلاق
وظك انا مانقولك وانت مايخفى عليك
من يجي الطفل تحطو امو فلاكراش ولا عند جارتها
لا تربية لا قيم ولا حتى شيء
كيفاش حبيتو يكون عبد خير
ههه روح لاي طفل رافد حبة حلوة قولو يعطيك منها
الا كان عطالك الدنيا مزالها بخير ههه
ربي يصلح الاحوال برك خويا
تقبل مروري
واسف على الاطالة
اني نحب نتفلسف ههه
ونضيفلك بعض الخرباشات بين البارح واليوم

البارحـ : كل يوم يلقاك جارك واش خصك يا جاري اذا جاب كاش حاجة يغرف لك منها
اليومــ : تحسب راك عايش لوحدك و يرسل ولده برا في يده حاجة شابة باه يغيض بيها ولد جاره

البارحـ : الضيف اذا جا على غفلة يرحب احسن ترحيب و يعطوه واش كاين ف الدار
اليومــ : اذا جا الضيف على غفلة يقيسوه ف الثقيل هل تقعد تتعشى عندنا و قتاه تروح

البارحـ : في رمضان نتجمعوا الفاميلا بتقسيرة مع الزلابية و التايـ و الضحك
اليومــ : ماعندكش لافامي قاع لاهيين في رواحهم و انقطاع صلة اللرحم

البارح : الناس قاع يبغو بعضاهم
اليوم : في وجهك يموت عليك و في ضهرك يقطع فيك

البارح : المريض قاع الناس تتلم عنده باه ينسوه شوية و يونسوه
اليوم : مام با ما يطلوش عليه و لا راحو باه يشوفوه يستشفاو فيه

بكري : عمرك و لا تحس روحك وحدك الناس قاع دايرة بيك و تسقسي عليك
ضروك: حتى و لا كنت في وسط الناس تحس روحك وحدك كل واحد لاهي في روحو
البارحـ :الناس نيّة وواحد ما يحسب روحو على خوه
اليومــ : الناس خبيثة وتدعي النية

البارحـ : خلينا ناس كانت معرف واش حاسبة روحها
اليومــ : لقيناهم رجعو كالم معرف واش تبدل