قصيدة

هاذ الدنيا لوكان جات تتعاود مادا بيا

نعاود حياتي ملي بدات حتى للدقيقة هاذيا

نروح نصلي زوج ركعات نطلب الله يعفو عليا

أويغفر لي كل ما فات و نطلب السماح من والديا

عملتلهم بزاف حاجات و كويتهم بشحال من كية

بابا تعذب و يما بكات ودعوتهم راهي اتبع فيا

حتى حياتي كامل ولات غير عذاب و ميزيريا

وين نحلق نلقاها طفات دايما بلية موراها بلية

طول النهار هايم وين جات وندخل للدار غير لعشية

ندخل غير باش نبات نلقى يما تستنى فيا

اتدخلني غير بالسكات تسكت فيا و تخبي عليا

وتخسر عليا زوج كلمات آه يا خسارة التربية...

واش جابت و واش ربات واش تعبت و سهرت عليا

رجعتها زوج دمعات و الله عيب و خسارة عليا

يلعن ديك الساعة بالذات ساعة وحدة لعبت بيا

ما ننساهاش طول الحياة تبقى دايما بين عينيا

فديك الدقيقة لحكاية بدات جاو الناس دارو بيا

ندو ونجيبو فالحكايات و بدات الريحة تجبد فيا

قالولي ما جابت ما دات ذوق و تشوف شحال خلوية

أجبد غير وحدة و فرات تشوف كي تنسى هم الدنيا

قلت ماعليش نهالر و فات ما نضنش بلي تحكم فيا

أنا اللي نحكم فالذات ماشي الذات اللي تحكم فيا

الجبدة و لات زوج جبدات من بعد قارو و من بعد كمية

من بعد ولات اذا ولات بدات بشوية تكبر الحية

مناسبات من بعد عادات من بعد زوخ و رجولية

من بعد ولات تمشيلي فالذات ولات هي اللي تمشي فيا

وين نهرب نلقاها جات حتى لعندي تحوس عليا

و تقابرني حتى فالشدات حتى نصيبها بين يديا

تحرقت ولات فتات تلوات و تستنى فيا

نجبد وحدة زوج ثلات لتم تتبدل العقلية

نولي نشوف في حاجات عمري ما شفتهم بعينيا

حياة خير من هاذ لحياة و دنيا خير من هاذ الدنيا

دنيا وحدوخرا اتبنات باش تكون مخدومة ليا

ما فيعها لا عذاب لا معاناة لا تعب لا مسؤولية

وين ما نحب نروح نبات دنيا كامل بين يديا

لحجر تردهم مخدات و التراب يولي حنين عليا

نطيح او نرقد وين ما جات نرقدو لما نحل عينيا

نسمع داخل راسي حاجات و كلي حس يقلق فيا

و يقول لي هذا ليل و فات هاذي ليلة فاتت خلوية

و اليوم وين رايح نبات ليلة وحدوخرا راي تستنى فيا

و لازملي مخدرات لازم قارو و لا كمية

و لا قطرة و لا حبات و لا غبرة المهم هيا

حكمت فيا ودرك فرات درك خلاص اتطفرت فيا

العقدة ولات زوج عقدات و الدنيا راهي تعقدت عليا

خسرت و خسرت بزاف حاجات خسرت كلشي بسبابها هيا

خسرت ربي و خسرت الصلاة خسرت الدين و خسرت الدنيا

خسرت مالي و صحتي رشات خسرت خاوتي و خسرت والديا

خسرت بنتي و زوجتي مشات ولاو كامل يهربو عليا

خسرت عمري و ضيعت وقات وزدت خسرت حتى العقلية

و بصراحة في ثاث كلمات ولات معنديش شخصية

حاجة وحدة برك بقات حاجة وحدة مازالها حية

الروح مدام مزالها فالذات نقدر نوقف على رجليا

نقصد رب المخلوقات نسجدلو و ندير النية

و مدام النية لربي صفات بلا شك راو رايح يسمع ليا

شكرا جزيلا على هذه الابيات من الشعر الملحون يا اخي الحاج

merci

وبل الواقع نحن نموت الف مره..
من عمق الاشتياق..
من عمق التساؤلات..
نتمنى ان نعود ليوم واحد لتلك الايام..
لكن بات هذا الامر مستحيلا..
تلك الايام ماتت ولا امل لها بالعوده..
فالذكرى هي تحيها..
عندما نشتاق لها تظل موجوده بذاكره..

[ندعوك للتسجيل في المنتدى أو التعريف بنفسك لمعاينة هذه الصورة]

........... بقبق.........
يا رمال حلتنا زولاً كان مأنسك يا حليلو
فات رحل من بلدو روح والله روح

هاذ الدنيا لوكان جات تتعاود مادا بيا

نعاود حياتي ملي بدات حتى للدقيقة هاذيا
ولاكن يا للاسف لاتعاد
مشكور الاخ الحاج على الكلمات ودمت بود

شكرا جزيلا على هذه الابيات من الشعر الملحون يا اخي الحاج

شكرا لك اخي وليد على المرور