بسم الله الرحمن الرحيم
السلام عليكم و رحمة الله تعالى و بركاته
واش راكم يا جماعة سيدي سعادة ؟؟ و سيرتو ناس واش راك تهدر
إن شاء الله بخير
و اليوم قررت نكتبلكم و نفرغلكم شويا هنا بعد ما شفت العجب في بلادي
و دزاير كيما نقولو راهي أم المعجزات
المهم .. اليوم جينا رايحين لدار صاحب بابا .. ايا وصلنا بابا فالتاكسي
لحقنا لواحد الـ rond point يا عجابة ربي في نص مدينة حذا المجلس الشعبي البلدي
كورتاج كبيير تاع مانعرف شكون و دايرينلك الخيل و الفرسان و هابطين كامل يشطحو ثما فالـ rond point .. دارو عرس ثما .. الخيل يشطحو العباد هبطو يشطحو
و الناس لي يجي يفوت مايقدرش .. الـ circulation حابسة خلاااص .. الناس كامل تصوني باش يفوتو والو .. عيينا نفوتو
و من العجب .. ماكان حتى بوليسي واقف ثما .. يا دين الله قدام المجلس الشعبي البلدي .. و rond point كبيرة و الزردة قايمة الناس واحد ما يفوت .. والامن ماكانش
حبيت نفهم مي عييت
اسكو المشكل في الشعب ؟؟ و لا في الدولة ؟؟ و لا فينا في زوج ؟؟
نورمالمو هذو لي مدايرين العرس .. يزهاو على رواحهم واحد ماهو محرملهم .. مي يخرجو برا المدينة و يشوفو كاش طرحة و يبردو قلوبهم فالشطيح و الرديح
و نورمالمو رقابة الدولة تكون .. يعني لازم تكونالدرك ينظم المرور .. يا دين الله جيش تاع طواكس حابسين يصونيو باش يفوتو .. و ناس معرسين ولا على بالهم
و الدولة راقدة على فرد وذن
بصح الدولة تاعنا ديما ماهيش حاضرة مشي غير في هاذي .. الدولة تاعنا تمشي بسياسة خليهم ياكلو بعضاهم .. يعني تخلي اهل العرس و المواطنين يدير واش يحبو بيناتهم و هي راهي رايحة
تخاف لا تقيس المواطنين و يثورو ضدها .. مالا تقولك خليهم برك يخليوها على بعضاهم
المهم نحكي واش نحكي مانكملش .. و راني طولت عليكم بزااف
حاب نخليلكم الكلمة ليكم تعلقو شوي على هذا الموضوع
واش رايكم ؟؟؟
و أنا هذا وين في بداية عمري و راني كل يوم نزيد نيأس من الدولة تاعنا كثر من بكري
مانعرف وين رايحة البلاد .. ربي يستر برك
أيا سلااااام عليكم يا جماعة سيدي سعادة
إن شاء الله يكون تفاعل حول الموضوع
موضوع: اسكو المشكل في الشعب ؟؟ و لا في الدولة ؟؟ و لا فينا في زوج ؟ 
