HADJ TISSAGE
النائب العام
عـدد مساهـماتـكـ ✿ : 3452
تـاريخـ التسـجيلـ ✿ : 14/01/2010
العمر : 32
المـوقـــــ ع ✿ : سيدي سعادة
 |  موضوع: سقسي gogle ما تخليكش محتار الثلاثاء 5 أكتوبر 2010 - 23:30 | |
| يا بني اقراو القصيدة
بسم الله
نَافِيقِي يَا لاَّلَة عَبرْ الأَقْمَارْ
..................هَذَا الْعَالَمْ عَادْ لَينَا غَيْ دَشْرَة
قَرَّبْنَا بَعْضَاتْنَا زَايَدْ يَصْغَارْ
.................كَوكَبْنَا مَكْشُوفْ كَامَلْ فِي نَشْرَة
شاتِيني يَا لاَلَة وَ الشَاتْ اخْيَارْ
...................وَانْشَاتُو بَعْضَاتْنَا فِي ذَالَسَهْرَة
وَالْمَسَنْجَرْ يَاكْ شَاطَرْ كِي لَطْيَارْ
.................... مَا تُصْعُبْ الصَاعْبَة عَنُو خَطْرَّة
كُونِيكْتِي وَ انْرُدْلَكْ نَسْكَنْ سِيبَارْ
...................وانْحُطْ الْكِتْمَانْ في وَذْنِي مَرَّة
نَحْكُو بَاللِي كَايْنَة حَتى لَسْرَارْ
....................مَا تَخْفِينَا خَافْيَة قَلْبِي يَبْرَة
وْ بالْكَامِيرَة وَابْ نَعْطِيلَكْ لَخْبَارْ
...................وَنْشُوفُو بَعْضَاتْنَا يَا ذَلْ الْعَذْرَة
وَامْلِي عَينَكْ يَاكْ قُلْتِيلِي مَسْــرَارْ
...................وْ نَمْلِي عَينِي مَا تْغِيبِي يَا قَمْرَة
أنَا مُدْمَنْ بِيكْ يَا زَينَتْ لَشْفَارْ
.................مَنْ عَينِيكْ انْبَاتْ دَحْرَة عَنْ دَحْرَة
الْمِسافَة بَينْنَا بَحرْ وْ قِيفَارْ
.................قَرَّبْهَا صَنْدُوقْنَا بَاهِي النَظْرَة
انْبَكَّرْ نَبْدَاوهَا مَنْ شَاوْ انْهَارْ
.................الْقَهْوَة وَالْقَارُو زَادْ وْ فُخْرَة
مَا نَتْغَدَّى مَا انْرَوَحْشِي للدَارْ
................ضَيَعتْ الأحْبَابْ لِي كَانُو نَعْرَة
رَاحْ الْقَلبْ وْ ضَاعْ منِي يا شُطَّارْ
.................ذَ الْكَبْدَة وَدَّاتْنِي شَورْ الْحَدْرَة
حَبَّيتَكْ بَخْيُوطْ وَ اقْزَازْ الْبُلاَّرْ
.................واتْرِيسِيتِي جَامْلَتْنَا يَا عَطْرَة
وْ خَلي جْيُوبِي سَاكْنَة فِيهُمْ لَسْفَارْ
................نُنْفُضْهُمْ وَ انْزِيدْهُمْ ثَانِي غَبْرَة
كُونِيكَسْيُو دَاهْشَة تَفْنِي لَعْمَارْ
................مَتْحَتَّمْ تَحْمِلْهَا غَي بَالنَّتْرَة
كِي مَشْيَتْ فَكْرُونْ عَامِيهْ الْغَبَّارْ
..............نَاقَلْ حَملْ اكْبِيرْ في ضَهْرُو حَجْرَة
عَنْ جَالَكْ هَانِي انَقَّزْ فِي لَوعَارْ
...............حَتى مْنَ الْجِيهَازْ فَيرَسْ بَالْكَثْرَة
يَبْلُوكِيلي دايْمًا هَاذْ الْمَكَّارْ
...............وِيخَلِيني شَادْ رَاسِي ذَالْعُرَّة
إِيعَادَة تَشْغِيلْ وَ نَايَا بَوَّارْ
..............مَنْ غُلْبُو مَسْكِينْ حَامِي غَي جَمْرَة
والرَقَّاصْ إيدُورْ بالسَاعَة وَ انْهَارْ
..............وِيطَلَّعْ لَحْسَابْ عَنِي بَالْفَتْرَا
هَذَا الْمَرضْ اللِّي حْكَمْنِي قَالُو ضَارْ
..............لاَ طُبَّة تَبْرِيهْ يَشْبَهْ للسَكْرَة
رَزقْ أُولاَدِي طَاحْلي بِيهْ السَمْسَــارْ
.............لا لَحْظَة لاَ زَيتْ لاَ خُبْزَة كَسْرَة
مَا نَكْسِي لَولاَدْ لاَ مُولاَتْ الــــــدَّارْ
.............نَخْدَمْ عَنْ سِيبَارْ بَابُو مَنْ ظَهْرَة
الْمَواقَعْ كَاثْرَة خَيَّرْ وَ اخْتَارْ
.............الْمُبَاحْ اكْثِيرْ تَبَّعتْ الجُرَّة
في لُوَّلْ يَبْدَاوْهَالَكْ بَالإشْهَارْ
...........وْ كِي تَتْغَمَّقْ مَا ابْقَاتَشْ لِي عَورَة
الله يَنْعَلْ بُوكْ يَا صَنْدُوقْ الْعَارْ
........... يَا فَضَّاحْ الْفَاضْحَة وَ الْمَسْتُورَة
عَرْبِيَاتْ امْخَدْرَة مَنْ كُلْ اعْمَارْ
............وَينْ النَخْوَة وَينْهُمْ نَاسْ النَعْرَة
مُخِّي عَزَّرْ مَا الْقَى لَيهَا تَفْسَارْ
..........خُطَّة مَنْ الشَيطَانْ وَ مْعَاهْ الْكَفْرَة
عَادْ الْعِرضْ ارْخِيسْ يَشْرُوهْ ابْدُولاَر
...........للتِجَارَة رَابْحَة مَنُو كَثْرَة
كَايَنْ شِي مِيزَاتْ مَانِيشِي نَكَّارْ
........... مَانِي ضَدْ اعْلُومْ فِي عَصرْ الذَرَة
جِهَازْ الإعْلاَمْ آلَة يَا نُظَّارْ
...........يَتْجَاوَبْ امْعَاكْ يَعْطِيكْ الزَورَة
سَقْسِي قُوقَلْ مَا يْخَلِيكَشْ مَحْتَــــــارْ
............كُلَشْ بَالْبَيَانْ وَ امْعَاهْ الصُورَة
وَ انْتَايَا رُبَّانْ مَثَلْتَكْ طَيَّارْ
............ أرْضَكْ صَلْبَة مَا تْكُونَشْ مَغْرُورَة
تَهْبَطْ فِي لَمَانْ وَ اخْتَارْ الْمَطَارْ
.............تَسْلَمْ وَ الرُكَّابْ تَرْجَعْ مَسْرُورَة
حُزْنِي عَنْ شَبَابْنَا في ذَالْمَشْوَارْ
.............اغْزَاوَهْ باقْمَارْ خَلاَّوَهْ عَبْرَة
تَلْقَاهْ الْمَسْكِينْ يَمْشِي كِي لُحْمَارْ
.............ضَيَّعْ دِينُو وْ ضَاعْ هُوَ بَالْمَرَّة
فِيقُو يَا شَبَابْ مَنْ هَذَا التَكْسَارْ
.............وَانَا امْعَاكُمْ مَا انْعَاوَدْ ذَالْعَثْرَة
عَبدالواحد هُو النّاظمْ ذِي لَشْعَارْ
............وَ عْطَاكُمْ مِيثَالْ وَشْ رَاهُو يَصْرَة
نَخْتَمْ بَالصَلاَة عَنْ سِيدْ الأبْرَارْ
............مُحمدْ شَفِيعْنَا يَومْ الحْشْرَة
| |
|
kentur
مشرف
عـدد مساهـماتـكـ ✿ : 899
تـاريخـ التسـجيلـ ✿ : 15/09/2009
العمر : 47
المـوقـــــ ع ✿ : sidi saada
| | موضوع: رد: سقسي gogle ما تخليكش محتار الأربعاء 20 أكتوبر 2010 - 0:48 | |
| | |
|
WALID
المدير
عـدد مساهـماتـكـ ✿ : 2813
تـاريخـ التسـجيلـ ✿ : 20/02/2009
المـوقـــــ ع ✿ : سيدي سعادة
| | موضوع: رد: سقسي gogle ما تخليكش محتار الأربعاء 20 أكتوبر 2010 - 9:38 | |
| | |
|
celtic
مشرف
عـدد مساهـماتـكـ ✿ : 1513
تـاريخـ التسـجيلـ ✿ : 13/02/2010
العمر : 36
المـوقـــــ ع ✿ : قرـــboussaـــ
| | موضوع: رد: سقسي gogle ما تخليكش محتار الأربعاء 20 أكتوبر 2010 - 13:24 | |
| | |
|
HADJ TISSAGE
النائب العام
عـدد مساهـماتـكـ ✿ : 3452
تـاريخـ التسـجيلـ ✿ : 14/01/2010
العمر : 32
المـوقـــــ ع ✿ : سيدي سعادة
| | موضوع: رد: سقسي gogle ما تخليكش محتار السبت 4 ديسمبر 2010 - 22:19 | |
| MERCI
WALID
CELTIC
KANTUR WA MEN KBAR
TASSSSSSSSSSSSSSSSLAMOUUUUUUUUUUUUUUU | |
|
