عـــترة وعتــــر

أحم

منتديـــــــات سيدكم سعــــــادة و تسجيلات mokh_t@r Alméria

يقـــــــــــــــــــدمان

فيـــلم " عتـــــــرة وعتـــــــــــر"

بطولة: وحد المخلوق في دور "عتـــر" والمغبونة في دور "عتـــــــرة"

سينــــــــاريو: مختار عالمدار

إخراج: مختار عالمدار توجور

المشهــــــــــد الأوّل

وحد النهار كان عتر شاعل الميكرو تاعه ويكوناكتي في وحد المنتدى وكان معاه ولد خالته "بعبوز"

يـــــــّا دخلوا لوحد الموضوع آتيراهم إسم صاحبه اللي هو "عـــــــــترة الوهرانية" ههه

دخلوا للموضوع لقاو المحتوى تاعه شكيل في شكيل المهم هوما هاداك الوقت مابانلهمش شكيل

، حطّوا رد وقعدوا يقارعوا

ضربت 24 ساعة مين جات "عترة" لقات الرد تاعهم اللي ضربوا ساعتين وهوما يزوقوا فيه شبعت ضحك وردت عليهم

قالت لهم : مرسي خويا "عتــر" على الرد

هــــــــــــــــــــــــــــــــــــــــــاو خوكم عـــتر غي سمع هاد الرد ورااااااااااااااااااااح فيها ههه القلوبة في عينيه وحالته حالة
.

المشـــــــــــــــهد التاني:

بعد مرور شهر تقريبا، تطورت الأمور بين عتر وعترة ووالفوا بعضهم ولاو كل يوم يحكوا فالخاص أيا رسلتله الأمسن تاعها

المهم بعد مرور شهر كملت لعترة الكونطرا تع الأنترنيت وقالت له صاي مانزيدش ندخل

عتر هاديك الليلة صرى فيه الباطل ههه وهي دخلتها عليه بكا (تعلقت بيه مسكينة) ههه المهم كي جات رايحة قالت له

خليلي نيميرو تاعك نشوف كي ندير نعيطلك مالليسي ههه

المشـــــــــــهد التالت:

في اليوم التالي عتر قاعد مكوناكتي حتى صونا البورطابل المصدي تاعه لقى نيميرو جديد

ردت عليه وحدة وقالت: " صباح الخير"

عتر: "صباح النور ، شكون؟؟ ماتقوليليش عترة؟؟"

المتصلة: ضحكت ضحكة وقالت: "واه ههه كيفاه حتى عرفت؟؟"

عتر: "علاه أنا وين راهي هاد الشيرة اللي غادي تعيطلي آpـــار عترة"

المشـــــــــهد الرابع:

فاتوا شهرين وعتر وعترة داروا رونديفوا وتلاقاو وراحوا للبيزيريا هههه عتر مسكين مزلوط عنده 40 ألف التالية في جيبه

قعدوا وجات السارفاز حطتلهم الكارني دو موني ههه عتر مابغاش ياكل قالها راني شبعان وهو ضايع بالجوع

خاف يلا تجيهم بزاف ههه المهم هي دوموندات بيزا روايال وهو قعد يشوف

قعدت تاكل وتهدر معاه وهو غي يدودر ويشوف كيفاش يجبد هاداك الكارني ويقرى السومة تع البيزا اللي جابتها ههه

كي شاف لقاها تدير 30 ميل هه ولات له العمر

المهم كي جاو خارجين من البيزيريا حلفت قالت له أنا اللي نخلّص ههه عتر قال لها علاه تحلفي ياك أنا الراجل هنا

وهو المخلوق فرح كي خلصت هي

المشهد الخامس:

فوتوا يامات منعرت يلا شابين ولا مشي شابين ووحد النهار جرى بيناتهم حوار فالتلفون:

عتر: ألو

عترة: وي

عتر: مالكي؟ علاه كنتي مبلعة البورطابل هادو يومين؟

عترة: والو كنت كارهة مابغيتش نهدر مع الغاشي

عتر: تسمى أنا غاشي؟؟؟

عترة: علاه أنت مشي بنادم؟؟

عتر: ها صحا، مادابيك سيبرمي النيميرو تاعي ماليوم نريحك مني

(تنارفا عتر أوّل مرة يخرج خرجة كيما هادي ههه وراكروشالها في وجهها)

من هاداك النهار عتر بدّل النيميرو ومازادتش عترة سمعت صوته هو ريح منها وهي تاني "ما صدّقت" ريحت منه ههه

وهكذا عاش عتر بسلام

النهاية

ســـــــــؤال متعلّق بالقصّـــــة

هل تؤمن بالحب عبر الإنترنيت؟

هههههههههههههه نورمال المهم عتر ماتاحش وراه عايش غاية ولكن مع الإشارة إلى البعبوز حاضر دائما وقت المناسبات السبانخ ههههههههههههه

اودي ماوليناش نامنوا بلحب أصلا كيفاه في الانترنت

اشداني يا عالمدار هذه القصة حقيقية 100/100

تاع عترة وعتر اكدلي غير على البيتزا عتر نحشا تله ما حبش ياكول هههههههههه
*************************************ه

فيما يخص سؤالك الحب في الانترنت مجرد وهم وليس له من الصحة شيئ واو بألأحرى هو حب مؤقت ينتهي بانتهاء
فاتورة النات او تغير ررقم الهاتف او نهاية مصلحة احد الطرفين

yes_in كتب:: هههههههههههههه نورمال المهم عتر ماتاحش وراه عايش غاية ولكن مع الإشارة إلى البعبوز حاضر دائما وقت المناسبات السبانخ ههههههههههههه

ههههه واه راه مريّح دروك عتر ماراه يفليكسي ماراه يبات قاعد

ولد خالته بعبوز هاداك زهره يلاقيه بالصوالح الشابين كيما هو هههه

بالنسبة للجواب تاعك فرأيك صواب يحتمل الخطأ

شكـــــــــراً على العبور ياسينوفيتش

WALID كتب:: اشداني يا عالمدار هذه القصة حقيقية 100/100

تاع عترة وعتر اكدلي غير على البيتزا عتر نحشا تله ما حبش ياكول هههههههههه
*************************************ه

فيما يخص سؤالك الحب في الانترنت مجرد وهم وليس له من الصحة شيئ واو بألأحرى هو حب مؤقت ينتهي بانتهاء
فاتورة النات او تغير ررقم الهاتف او نهاية مصلحة احد الطرفين

ههه ربّما كذلك وليــــــد ولكن خوك عتر ملهيه دار كونيسونس فالنت ومن بعد ولات فالبيتزيريات ههه

كيـــما قالك وليد القصة راهي حقيقية اممممم

وعتر صار ماشي انت ؟قول قول وما تحشمش ههههه

انا قتلك جي عليك غير مخرج

كون غير رسلت السيناريو لجعفر قاسم وفوتهانا في رمضان خير من التبهدايل الي راهم

دايرينهم

كيما العادة و العوايــــــــــد فور فن وديكور (هادي تاع وليد خونتهاله)

هل تؤمن بالحب عبر الإنترنيت؟

هذي من بعد نرجعلها .الهدرة راهي فيها طويلة وعريضة .والكونكسيون راهي تمرض قريب

هبلتني.

قصة حقيقية

بصح المشكل هو ضايع بالجوع وقال راني شبعان

@ لــؤلــؤة : كيـــما قالك وليد القصة راهي حقيقية اممممم

وعتر صار ماشي انت ؟قول قول وما تحشمش ههههه

حقيقية القصّة واه تعرفيني أنا نجيب من راسي؟ أنا نجيب غي الـvـــيريطابل ههه

مشي أنا عتر، أنا سموني مخـــتار عالــمدار ماديريش فيا الهدرة هههه

@لــؤلــؤة: هل تؤمن بالحب عبر الإنترنيت؟

هذي من بعد نرجعلها .الهدرة راهي فيها طويلة وعريضة .والكونكسيون راهي تمرض قريب

هبلتني.

أوكي مادام برّرتي بالكوناكسيون أنا أقبل التبرير ههه خاطرش كلنا في الهواء سواء ههه

بصّح وعدتيني تجاوبي، راني نقارع للجواب .....

ــــــــــــــــــــــــــــــــــــــــــــــــــــــــــــ

@ الحاج: بصح المشكل هو ضايع بالجوع وقال راني شبعان

ههههه والله عندك الحق خويا الحاج، غاضني عتر علابالك قسملي قلبي المخلوق هههه

أشّكـــــــــرا لكلاكما إلتفاتته الأكثر من رائعة

هــــــــــــــاراني رجعت .مسااااااااااء النووووور و السروووور

أنا سموني مخـــتار عالــمدار ماديريش فيا الهدرة

علابالي بلي يسموك مراد عالمدار اقصد المختار مجـــــــرد مزحة لا غير. نعرفك بلي خطيك هههه

اه ه فيما يخص قضية الحب عبر الانترنيــت فهو موضوع مثير للجدل...

أولا أحب أن ابدأ كلامي بمقولة لا اعرف سواها في مايخص ذلك الشيءالذي يقع تحتي المسمي بالحب

لاتعتمد على الحب فهو نادر ولاتعتمد على الانسان فهو غادر وانما اعتمد على الله وحده فهو القادر...

انا شخصيا ضد هذه الفكــــرة(الحب في النت). اصلا لا احب ربط علاقات حب خصوصا في النت لأنني اكره مواقع التشات

فيبدو لي ان الحب في النت مثل الزبدة الطرية نهار طل عليها الشمس تذوب وتصبح ماكانش

يعني الحب في النت لا وجود له اطلاقا هذا حسب رأي وكل واحد ويختلف رأيه

كيفاش تحب انسان قبل ماتشوفو لأنو ممكن اي طرف يكذب ومايقولش الصح

وزيد انك تحب واحد مشفتوش هادي ماتدخلش في البال علابالي تقولولي عبر الكام ؟

والكام تخدع مش رايحة تبين كل شي

وواش راح يضمنلك فيه انو يحبك وانو صادق معاك

الناس راهي غير مع بعضاها وماقدروش يضمنو

كيما قال عباس

انا معاها ودايرة التير ...ههههه

خلاصة القول خويا المختار الحب بصفة عامة اكبر أكذوبة في واقعنا المعاش أقولها وأنا على يقين

من كثرت لي شفت خلاص ما بقيتش نأمن بيه .لواحد يقارع واش كاتبهله ربي وصي .

فمابلك بعالم الافتراضي...عالم الأقنعة

هو خيال وسراب ووهم كبيـــــــــــــــــــــــر

هذا هو رأي وشــكرا

تقبل فلسفتي الزايدة خويا المختار

ــــــــــــــــــــــــــــــــــــــ

سأضل دائما..أتقبل

الرأي الناقد و الحاسد

فالأول يصحح مساري ..

والثاني يزيد من اصراري

برافو لــؤلـــؤة تحليل وتشريح في محلّه ولكـــــــــن الخلاصــة ... أمممممم ليست بالدقة

التي تجعلك تحكمين حكمـاً قد تحدث فيه إستثناءات

أعرف بعض العيّنات التي إنتهى بها المطاف عن طريق النت إلى مايحبه المولى عزّوجل

وما يباركه

تقبّلي تعقيبي أخت لـــؤلـــؤة فرأي خطأ يحتمل الصواب ورأيكم صواب يحتمل الخطأ ^^

مانوليش شباب مين نولي سيريو ههه خاطيني نقاش جاد